پ.ی.د. ئه‌مین فه‌ره‌ج شه‌ریف/ مامۆستا له زانکۆی سه‌ڵاحه‌دین
محه‌مه‌د ڕه‌حمان ئه‌حمه‌د/ ماسته‌ر له زانکۆی سه‌ڵاحه‌دین
پێشه‌كى
هه‌موو کۆمه‌ڵگایه‌ک بونیادێکی کۆمه‌ڵایه‌تی و که‌لتووری تایبه‌ت به‌خۆی هه‌یه که ڕه‌نگدانه‌وه و زاده‌ی فاکته‌رگه‌لێکی وه‌ک مێژوو، جوگرافیا، دابونه‌ریت، ئایین، تایبه‌تمه‌‌ندیيه ڕه‌گه‌زيی و نه‌ته‌وه‌ییه‌کانی خۆیه‌تی... ئه‌مانه‌ش کاریگه‌ری زۆر و به‌رچاویان ده‌بێت له‌سه‌ر کایه‌ی سیاسه‌ت، چونکه سیاسه‌تیش ڕه‌نگدانه‌وه و کارتێکراوی ژێرخانی کۆمه‌ڵایه‌تی و که‌لتووريیه. کارلێککردنی کایه‌ی کۆمه‌ڵایه‌تی و سیاسی، کاریگه‌ری هێزه کۆمه‌ڵایه‌تيیه‌کان و ده‌سه‌ڵات له‌سه‌ر یه‌کتری، چۆنیه‌تی یه‌کتر به‌رهه‌مهێنانه‌وه‌یان، ئاستی پاڵپشتی و ململانێی یه‌کتری... جێگای بایه‌خی زۆرێک له بیرمه‌ندانی بواری کۆمه‌ڵناسی سیاسی و گه‌شه‌پێدانی سیاسیيه. پرسی گه‌شه‌پێدانی سیاسیش له دوای دووه‌م جه‌نگی جیهانیيه‌وه تاوه‌کو ئێستاش پرسێکی گرنگ و بایه‌خداری کۆمه‌ڵگه‌ی نێوده‌وڵه‌تی به‌گشتی و وڵاته تازه پێگه‌یشتووه‌کانه به‌تایبه‌تی، به‌جۆرێک له زۆربه‌ی وڵاته تازه پێگه‌یشتووه‌کان پرۆسه‌ی گه‌شه‌پێدانی سیاسی شکستی هێناوه له‌وکاته‌وه تا ئێستا، ئه‌مه‌ش نه‌ک ته‌نها کێشه‌یه بۆ ئه‌و وڵاتانه، به‌ڵکو بووه‌ته کێشه بۆ کۆمه‌ڵگه‌ی نێوده‌وڵه‌تیش، سه‌ره‌ڕای هه‌وڵ و هاوکاريیه نێوده‌وڵه‌تیيه‌کان بۆ ئه‌م وڵاته تازه پێگه‌یشتووه‌کانه. بۆ ئه‌مه‌ش زۆرێک له زانایانی بواری کۆمه‌ڵناسی سیاسی جه‌خت له‌سه‌ر بونیادی کۆمه‌ڵایه‌تی و که‌لتووری ئه‌و کۆمه‌ڵگایانه ده‌که‌نه‌وه که وه‌ک ئاڵنگارگه‌لێک ڕۆڵ ده‌بینن له هه‌مبه‌ر پرۆسه‌ی گه‌شه‌پێدانی سیاسی.
کۆمه‌ڵگه‌ی هه‌رێمی کوردستانیش وه‌ک کیانێکی نیمچه‌سه‌ربه‌خۆ که له دوای 1991 ده‌رکه‌وت، به‌ده‌ر نیه له شکستخواردنی پرۆسه‌ی گه‌شه‌پێدانی سیاسیيه‌که‌ی. له‌م ڕووه‌وه‌ش ناسین و بنکۆڵکردنی بونیادی کۆمه‌ڵایه‌تی و که‌لتووری کۆمه‌ڵگه‌ی هه‌رێمی کوردستان، که تا چ ئاستێک ڕۆڵ و کاریگه‌رییان هه‌یه له‌سه‌ر پرۆسه‌ی گه‌شه‌پێدانی سیاسی و شکستپێهێنانی بایه‌خێکی زۆری هه‌یه، چونکه بونیادی کۆمه‌ڵایه‌تی و که‌لتووری هه‌ر کۆمه‌ڵگه‌یه‌ک ده‌بێته ژێرخانێک بۆ سه‌رخانه سیاسيیه‌که، به‌جۆرێک هه‌ردوو کایه کارلێک ده‌که‌ن و یه‌کتربه‌رهه‌مده‌هێننه‌وه.
تەواوى بابەتەکە لەم لینکەوە دابگرن و بخوێننەوە..