١- کاتێک ئازادی هەیە واتە مرۆڤ بوون بەدەستهاتووە. ژیان مانای ڕاستەقینەی خۆی لەدەست نەداوە. لەڕووی ئەخلاقییەوە ڕیاکاری و دووڕوویی بازاڕیان لاوازە.
لە کەشێکدا ئازادی بەرجەستەبێت، ئاڕاستە جیاوازەکان بەریەکتر دەکەون نەک شانبەشانی یەکتر بڕۆن. لێرەوە فرە ڕەنگی ژیان ئاڵا و واڵاتر دەکات. لە هەبوونی ئازادیدا مرۆڤەکان ڕووی حەقیقی خۆیان بەردەوام دەردەخەن ئیدی بەرامبەر هیچ شتێک، ڕووداوێک هەڵوێستێک توشی شۆک نابێت.
لەبەرامبەردا کاتێک ئازادی بوونی نیە، مرۆڤەکان ناچارن ماسک بەکار بهێنن، ئەوکات لە ڕووداوێک یان هەڵوێستێک کاتێک حەقیقەتی خۆی دەرەدخات خەڵکی توشی شۆک دەبن، چونکە ئازادای نەبووە، ئیدی ئێمە لە خەیاڵدانی خۆمان یەک وێنە بۆ هەموو مرۆڤەکان دەکێشین لە کاتێکدا لە ڕاستیدا وانیە.
٢- کاتێک ئازادی هەیە ڕەخنەگرتن زۆر دەبێت. ئەوەی گرنگە ئەوەیە ئێمە ئەخلاقیانە مامەڵە لەگەڵ ڕەخنەکاندا بکەین. واتە ئەگەر ڕەخنەکە جدی بوو پێویستی بە هەڵوێستە لەسەر کردن هەبوو پێویستە وابین، ئەگەر ڕەخنەکە ناواقیعی بوو پێویستە بە قەبارەی خۆی وڵامبدرێتەوە، ئەوەی گرنگە ئەوەیە کەرامەتی ئەو کەسەی ڕەخنەکەی گرتووە نەشکێندرێت، چونکە مرۆڤ هەرچی بێت و هەرچۆنێکبێت، دەبێت لای ئێمە کەرامەت و شکۆی پارێزراوبێت تەنانەت ئەگەر ئەوکەسە خۆشی بێ ئاگابێت لەوەی کە شکۆ و کەرامەتی کەسانی بەرامبەری شکاندووە، لە ئێمەوە فێربێت کە شتێک هەیە ناوی کەرامەتی مرۆڤە کە نابێت بشکێندرێت.
٣- ڕەحنەگرتن کوفرنیە، هەرکاتێک فێری ڕەخنەگرتن بووین، ئیدی هەموو ئەوشتانەی موقەدەس کراون و لە بنەڕەتدا موقەدەسنین حەقیقەتیان دەردەکەوێت.
٤- من خاوەنی بنەمای "لا اکراە فی الدین"م. واتە بۆم نیە ئاینی خۆم و ئەو شتەی تەواو یەقین و قەناعەتم پێی هەیە بەزۆر بەسەر کەسانی دیکەدا بسەپێنم. هەروەها، من چۆن ئازادم بانگەشە بۆ بیر و باوڕەکەم بکەم ئەوی بەرامبەریش هەمان ئازادی هەیە. چۆن ئازادم ڕێنماییەکانی ئاینەکەم جێبەجێدەکەم ئەوی دیکەش هەمان ئازادی هەیە ئەو کارە بکات. هەربۆیە کاتێک کەسێک ئازادە و بە تەواوی قەناعەتی دەڵێ: خوا نیە، بێگومان باوەڕی بە پیرۆزبوونی کتێبە ئاسمانییەکان و ئادەم و حەوا و بەهەشت و دۆزەخ نیە. ئازادیشە کاتێک دەڵێ باوەڕم پێی نیە.
٥- خودی ڕەخنەگرتن لە ئاین کارێکی ئاساییە، چ جای ڕەخنەگرتن لە پارتە ئیسلامییەکان و کەسە موسڵمانەکان، بەڵام کاتێک ڕەخنە دەگۆڕێت بۆ شەڕێکی کۆنە قین و حوکمی ناعاقڵانی تێدا دەردەکرێت، پێویست ناکات لە قەبارەی خۆی گەورەتر بکرێت و بە بەڵگەی ڕوون وەڵامبدرێتەوە. ناکرێت لە بەرامبەردا ئێمەش بێین و بە یاسای کاردانەوە وەڵامبدەینەوە و تەڕ و وشک پێکەوە بسووتێنین، ئەوکات ئێمەش هیچمان نەکردووە.
٦- کۆتا خاڵ ئەوەیە، ئازادی بەهایەکی گەردوونییە، لە هیچ بار و دۆخێکدا ناکرێت سازشی لێبکرێت. چونکە نەمانی ئازادی واتە تیرۆرکردنی مرۆڤ بە بێدەنگی. ئەگەر هەموو مرۆڤایەتی دژایەتی ئازادی بکەن من بەتەنها هەر بە بەهایەکی گەردوونی دەزانم. بۆیە هەمیشە من ترسم لە بوونی ئازادی نیە، بەڵکو هەمیشە ترسم لە نەبوونی ئازادی هەیە.
