وەڵامی ئەو پرسیارەی کە بۆچی لە هەندێ وڵاتدا، ناڕەزایەتییەکانی خەڵک لە دەسەڵاتێکی ستەمکار، هێزێکی گەورەی لێ دروستنابێت و ناتوانێ دەسەڵاتداران ناچار بە چاکسازیی، وازهێنان لە دەسەڵات بکات؛ کارێکی ئاسان و سادە نیە!

جارێ ئەوە لە موسەللـەماتی سیاسەتە، کە هیچ دەسەڵاتێک تا ناچار نەکرێت، مل بە چاکسازی و داواکاری خەڵک نادات، پاڕانەوە، داخوازی، بۆ دەسەڵاتێکی ستەمکار، تەنها مل ئەستورتری دەکات.

بەرمەبنای ئەوەی ناڕەزایی خەڵک ئەگەر نەخرێتە چوارچێوەی گونجاوی خۆیەوە، نابێتە هێز و ناتوانێ خۆی لەبەرامبەر دەسەڵاتدا بنوێنێت؛ هەر بۆیە بۆ وەرچەرخانێکی لەو جۆرە، زۆر شت ڕۆڵ دەبینن، یەک لەوانە بەهێزکردنی کۆمەڵگەی مەدەنی و ڕێکخراوەکانیەتی، هەر وڵاتێک کۆمەڵگەی مەدەنیی بەهێز و چالاک بێت، ئاسانتر دەنگی ناڕەزاییەکان دەگەنە دەسەڵات و دەبنە فشار.

لەم کاتەی کوردستاندا هەرچەند ڕێکخراو و سەندیکامان زۆرن، بەڵام لە قەیرانی مووچەدا چالاکترین، بەهێزترین ناو، مامۆستایانی ناڕازین، کە سەرەڕای هەر کەموکوڕییەک کە دەگونجێ لە گوتار و شێوازی خۆڕێکخستنیاندا هەبێ، بەڵام هەر ئەم ناوەیە بە دەنگی بەرز و کاریگەر نوێنەرایەتی کۆمەڵگەی مەدەنی دەکات. پشتیوانی لە مامۆستایانی ناڕازی گرنگە، تەنها لەو سۆنگەیەوە نا، کە دژی دوو حیزبی دیاریکراوی دەسەڵات وەستاوەتەوە، تەنها بۆ داواکردنی مووچەش نا، بەڵکو پشتگیری بزاوتی لەمجۆرە، بۆ هەموو وڵاتێک کە خەڵکەکەی کەڵکەڵەی دادپەروەری و مافی هاوڵاتیبوون و ... ی هەبێت گرنگە، دەسەڵات بەدەر لە هەرێم و پارتی و یەکێتی، وەک وەحش وایە، پێویسته لە چەند لاوە لغاو بکرێت، تا کەمینەیەکی ستەمکار حوکمی گەندەڵ بەسەر زۆرینەیەکی ستەملێکراودا نەسەپێنن.