دایکم هەمیشە دەیویست لە حەرام بە دوور بیین:
پاش ماوه‌یه‌ك ئه‌و دووكانه‌م به‌جێ هێشت و دووكانیكم له دووكانه‌كانى حاجى نه‌جیب به‌كرێ گرت، كه له‌ژێر ئیداره‌ى ئه‌و سه‌رده‌مه‌ى په‌روه‌رده و فێركردن (ئیداره‌ى فه‌رهه‌نگ)ى مه‌ریواندا بوو، دووكانه‌كه زیاتر فرۆشى هه‌بوو، منیش چه‌ند جاریك ڕۆیشتم بۆ سنه بۆ شتكڕین بۆ دووكانه‌كه، لاى جووله‌كه‌یه‌ك هه‌ندێک ورده‌واڵه‌م ده‌كڕى، جارێكیان له حسابدا هه‌ڵه‌ى كرد و نزیكه‌ى چوار سه‌د تمه‌نێكى هات به لاى مندا و پێى نه‌زانى، لاى هه‌ركه‌س باسم ده‌كرد ئه‌یگوت: وه‌ڵڵا پاروویه‌كى چه‌ورت ده‌ست كه‌وتووه، نه‌یده‌یتۆ به‌و جووله‌كه‌ى وا و وا پێكراوه! منیش كه بۆ دایكم گێڕایه‌وه، دایكم زۆر ئامۆژگارى كردم و باسى موحاسه‌به‌ى ڕۆژى قیامه‌تى بۆ كردم و گوتى: له ڕۆژى قیامه‌تدا كافر داواى ئیمانه‌كه‌ت لێ ده‌كات، كوڕم نه‌كه‌ى بیخۆیت، حه‌رام هه‌ر حه‌رامه، ماڵى كه‌س به‌كه‌س حه‌ڵاڵ نییه، ئینشائه‌ڵڵا ئه‌مجاره ڕۆیشتیته‌وه بیده‌ره‌وه، گوتم: باشه دایه گیان!. له جارى دواینا كه ڕۆیشتمه‌وه سوپاس بۆ خوا پاره‌كه‌م دایه‌وه. خوا پاداشتى خێرى دایكیشم بداته‌وه بۆ ئه‌و ڕێنموونییانه‌ى.
كودەتاى بەعسييەكان:
له هه‌شتى شوباتى 1963زدا به‌عسییه‌كان كوده‌تایه‌كیان به‌سه‌ر قاسمدا كرد و پاش خوێنڕێژییه‌كى زۆر سه‌ر كه‌وتن، ئه‌مانه میلیشیاى حه‌ره‌س قه‌ومییان دروست كرد، زۆر بێڕه‌حمانه ده‌ستیان به قه‌تڵوعامى شیوعییه‌كان كرد، ئینجا سه‌ركردایه‌تیى نهێنیى شیوعییه‌كان فه‌رمانى بۆ ئه‌ندامانى نه‌ناسراوى حیزب ده‌ر كرد، كه بڕۆنه ڕیزى حه‌ره‌س قه‌ومییه‌كانه‌وه بۆ ئه‌وه‌ى ئابڕوویان له‌ناو خه‌ڵكدا ببه‌ن، له واقیعیشدا ئه‌و كاره‌یان كرد، ده‌ڕۆیشتنه سه‌ر ماڵه ده‌وڵه‌مه‌نده‌كان و هه‌ندێک خانه‌واده‌ى به‌رێز جوانترین كچیان ده‌هێنایه ده‌ر و به تۆمه‌تى ئه‌وه‌ى كه گوایا شیوعییه ته‌عدایان لێ ده‌كرد! ئه‌مه بووه هۆى ئه‌وه به‌عسییه‌كان له به‌رچاو خه‌ڵكدا ڕه‌ش و قێزه‌ون ببن.
ئه‌م كاره ته‌نیا كارى شیوعییه‌كان نه‌بوو، به‌عسییه‌كانیش له‌وهو‌پێش كارى له‌وه خراپتریان دژى شیوعییه‌كان كردبوو، ده‌یانگێڕایه‌وه به‌عسییه‌كان له زه‌مانى عه‌بدولكه‌ریم قاسمدا ئه‌ڕۆیشتن ژنى خۆیان، یا ئافره‌تێكى خۆفرۆشیان له‌گه‌ڵ خۆیانا ده‌برد و ده‌چوونه ناو دێهات یا شارۆچكه بچكۆله‌كانه‌وه له‌وێ به لاى خه‌ڵكه‌وه ده‌یانگوت: ئێمه شیوعین، ئه‌و هاوڕێیه‌مان ئه‌وه‌ى له‌گه‌ڵیایه‌تى خوشكى خۆیه‌تى و هێناویه‌تى له‌گه‌ڵیدا ڕاده‌بوێرێت! یا ئه‌وه دایكى خۆیه‌تى و له‌گه‌ڵیدا ده‌خه‌وێت! ئه‌مانه هه‌مووى ببوونه ئه‌وه خه‌ڵكى زۆر ڕقیان له شیوعى و ڕژێمى كۆمۆنیستى ببێت و به خوێنى سه‌ریان تینوو بن.
دانوستانى لامەركەزى:
شیوعه‌كان ئه‌وانه‌ى مابوون هه‌ڵهاتن و ڕایانكرده كوردستان، ئه‌مانه له لایه‌ن پارتیى ئه‌و سه‌رده‌مه‌وه په‌نا دران، میلله‌تى كورد زۆر دڵخۆش بوو، كه ڕژێمى قاسمى نه‌ما و به‌و ئاواته‌ى به مافى خۆبه‌ڕێوه‌به‌ریى خۆى بگات (كه پێیان ده‌گوت: ئۆتۆنۆمى)، ئێمه‌ش له مه‌ریوان دڵخۆش بووین كه ئیتر ئه‌گه‌ڕێینه‌وه بۆ سه‌ر خاك و ئاوى خۆمان، به‌ڵام هه‌ندێک دنیادیده ئامۆژگارییان كردین و گوتیان: په‌له مه‌كه‌ن، ئێوه لێره دامه‌زراون، له‌وێش خانووتان سووتاوه، هه‌ندێک چاوه‌ڕوانى بكه‌ن بزانن ئه‌نجام به كوێ ده‌گات؟ پاشان ده‌وڵه‌تى به‌عس دانوستانى له‌گه‌ڵ شۆڕشى كورددا كرد، ئه‌مانیش نوێنه‌رى خۆیان به سه‌رۆكایه‌تیی "مام جه‌لالى تاڵه‌بانى" بۆ به‌غدا نارد، حكومه‌تى به‌عس ته‌نیا به‌وه ڕازى بوو مافى لامه‌ركه‌زى به كورد بدات، مافى لامه‌ركه‌زییش زۆر له‌وه كه‌متر بوو كه ئه‌مان چاوه‌ڕوانییان ده‌كرد.
شەڕ هەڵگيرسايەوە:
له‌به‌ر ئه‌وه له 10- 6 - 1963 ته‌پڵى شه‌ڕ لێ درایه‌وه و زۆر به قین و داخه‌وه ناوچه‌كه كه‌وته به‌ر هێرشى تۆپ و تانک و بۆمبارانى فرۆكه‌كانى ڕژێمى به‌عس. له‌م شه‌ڕه‌دا بۆمباى ناپاڵم و هێشوویى به‌كار هێنرا، ساڵح یوسفى كه ئه‌ندامى مه‌كته‌بى سیاسیى پارتى بوو له‌گه‌ڵ مام جه‌لالدا وه‌فدى دانو‌ستان بوو له به‌غدا گیرا و خرایه ژێر ئازار و ئه‌شكه‌نجه‌وه، ده‌وڵه‌تى به‌عس ڕایگه‌یاند ئه‌و كه‌سه‌ى سه‌رى "مه‌لا مسته‌فاى به‌رزانى" به‌سه‌ربڕاوى بهێنێت، به‌خششێكى سه‌د هه‌زار دیناریى عێراقى ده‌درێتێ. گه‌مارۆى ئابوورییشى بۆ سه‌ر كوردستان ڕاگه‌یاند.
كۆكوژى:
له‌گه‌ڵ ده‌ستپێكردنه‌وه‌ى شه‌ڕدا له‌ناو شارى سلێمانى سه‌رۆكى هێزى سوپاى عێراقى به ناوى زه‌عیم سدیق، كۆمه‌ڵێک خه‌ڵكى سلێمانى گرت، و ئازار و ئه‌شكه‌نجه‌یه‌كى باشى به گه‌روویاندا كرد، و پاشان له حامیه‌ى سلێمانیدا به گرێده‌ر چاڵى بۆ هه‌ڵكه‌ندن و له‌سه‌ر لێوارى چاڵه‌كه ڕایگرتن، ئه‌وه‌ى جنێوى به مه‌لا مسته‌فا بدایه به‌ره‌ڵڵاى ده‌كرد، ئه‌وه‌ش جنێوى نه‌دایه ده‌یخسته ناو چاڵه‌كه‌وه، له ئه‌نجامدا ئه‌وانه‌ى له‌ناو چاڵه‌كه‌دا بوون به گرێده‌ر خۆڵ به‌سه‌ریاندا كرا و زینده‌به‌گۆڕ كران. ئه‌مه یه‌ك حاڵه‌تى ترس و قینى له دڵى خه‌ڵكه‌كه‌دا دروست كرد، خه‌ڵكێكى زۆر چوونه ده‌ره‌وه و بوون به پێشمه‌رگه، بۆ تۆڵه‌سه‌ندنه‌وه له‌و تاوانانه‌ى ڕژێم. هه‌ر ئه‌م زه‌عیم سدیقه له دوو شوینى ترى ناوچه‌ى سلێمانى بۆ تۆقاندنى خه‌ڵكى خه‌ڵكه‌كه‌ى كۆكوژ كرد، یه‌كێكیان له دێى "هیزۆپ"ى لاى چوارقوڕنه و ئه‌وى تریان لاى چناره‌ى ده‌ربه‌ندیخان، پیاوانى خه‌ڵكى ئه‌م دوو دێیه به خۆیان و مه‌لاى مزگه‌وته‌كانیانه‌وه ده‌چن به‌ره‌و پیرى له‌شكره‌كه‌وه تا پێیان بڵێن، كه ئێمه لایه‌نگرى شۆڕش نین و خه‌ریكى كارى خۆمانین، ئه‌ویش به خۆیان و مه‌لا و قورئانه‌كه‌وه ده‌ستڕێژیان لێ كردبوون و به‌كۆمه‌ڵ كوشتبوونیان، و دێیه‌كانیشیان ئاگر تێ به‌ردابوون.
يارمەتيدانى سووريا:
هه‌ر له ساڵى 63دا به‌عسییه‌كانى سووریا‌ش كوده‌تایان به‌سه‌ر ڕژێمى لایه‌نگرى "جه‌مال عه‌بدول ناسر"دا كرد و سه‌ر كه‌وتن، له مانگى ئوكتۆبه‌رى ساڵى شه‌ست و سێدا به‌عسییه‌كانى سووریا هێزێكى سه‌ربازییان بۆ یارمه‌تیدانى به‌عسى عێراق نارد تا په‌لامارى شۆڕشگێڕانى كورد بده‌ن. هێزى یه‌رمووكى سووریایى له سنوورى دهۆك و زاخۆوه هێرشى هێنا و شه‌ڕێكى خوێناوى ڕووی دا و له ئه‌نجامدا هێزه‌كانى سووریا ژماره‌یه‌كى زۆریان لێ كوژرا و هه‌ندێكیشیان لى به‌دیل گیرا، دیله‌كانیان هێنابوو بۆ پێنجوێن من خۆم به چاوى خۆم بینیمن.
هه‌رچه‌ند ده‌وڵه‌تى به‌عس له‌و سه‌رده‌مه‌دا به‌شى زۆرى شاره‌كانى گرته‌وه، به‌ڵام ته‌نیا به ڕۆژدا ئه‌و ده‌سەڵاتى به‌سه‌ر شاره‌كان و جاده سه‌ره‌كییه‌كاندا هه‌بوو، ده‌نا به شه‌ودا به ده‌ست پێشمه‌رگه‌وه بوو.
ناڕەزايى شوورەوى:
پاش تێکشكانى ڕژیمى قاسمى و لێدانى شیوعییه‌كانى عێراق شووره‌وى زۆر دڵگران بوو، به‌تایبه‌ت پاش ئه‌وه كه هه‌واڵ بڵاو بووه‌وه شیوعییه‌كان قه‌تڵوعام ده‌كرێن، نوێنه‌رى شووره‌وى نامه‌ێكى به نه‌ته‌وه‌یه‌كگرتووه‌كان دا، ئه‌گه‌ر ده‌وڵه‌تانى بێگانه‌ى وه‌ك سوریا و ئێران و توركیا دەست له كاروبارى ناوخۆى عێراق وه‌ر بده‌ن ده‌وڵه‌تى شووره‌وى ناچار ده‌بێت خۆى تێوه بگلێنێت.
هه‌ر له‌و ماوه‌یه‌دا ده‌وڵه‌تى مه‌نگۆلیا یاداشتنامه‌یه‌كى دا به نه‌ته‌وه‌یه‌كگرتووه‌كان، كه له دانیشتنى داهاتوویاندا باسى جینۆساید (بنه‌بڕ كردن)ى میلله‌تى كورد له لایه‌ن حكومه‌تى به‌عسه‌وه بكرێت.
شیوعییه‌كان له كوردستاندا دوو بنكه‌ى چه‌كدارییان له "وڵه‌سمت" و "بانى خێڵان"دا دژى حكومه‌تى به‌عس دروست كرد، به‌ڵام زۆرى پێ نه‌چوو له لایه‌ن شۆڕشه‌وه هێرش كرایه سه‌ریان و چه‌كداره‌كانیان گرتن و بۆ زیندانى سامناكى ماوه‌تیان بردن. ئازار و سزایه‌كى باشیان دان، ئامۆزایه‌كى من كه شیوعى بوو و له ناویاندا بوو ده‌یگێڕایه‌وه چۆن به‌پێ سه‌ره‌وخوار هه‌ڵیانواسیوه و له خواریشه‌وه به دووكه‌ڵ قانگیان داون!
پاش بڵاوبوونه‌وه‌ى ئه‌م لێدانه‌ى شیوعییه‌كانى كوردستان، ده‌وڵه‌تى مه‌نگۆلیا داخوازییه‌كه‌ى خۆى له نه‌ته‌وه‌یه‌كگرتووه‌كان سه‌حب كرده‌وه.
لێدانى بەعس:
له سه‌ره‌تاى مانگى ده واته "ئوكتۆبه‌ر"ى 1963دا له‌نێوان هه‌ردوو باڵى ڕاست و چه‌پى به‌عسییه‌كاندا ناكۆكى و ئاژاوه‌یه‌ك دروست بوو، "عه‌لى ساڵح سه‌عدى" جێگرى سه‌رۆکكۆمار بوو، دژ به ناسر و لایه‌نگره‌كانى بوو، "تالیب شه‌بیب" و "حازیم جه‌واد"ى وه‌زیرى ناوخۆ عه‌لى ساڵح سه‌عدییان به شیوعى ده‌زانى و ده‌یانگوت ده‌بێت دوور بخرێته‌وه. پاش به‌ستنى كۆنگره‌یه‌ك عه‌لى ساڵح سه‌عدییان دوور خسته‌وه بۆ لیبیا، به‌ڵام ناكۆكییه‌كه هه‌ر هەبوو، له‌به‌ر ئه‌وه "میشێل عه‌فله‌ق" دامه‌زرێنه‌رى حیزبى به‌عس و "ئه‌مینول حافز" سه‌رۆکكۆمارى سووریا و ژه‌نه‌راڵ "سالح جدید" سه‌رۆكى ئه‌ركانى سوپاى سووریا هاتن بۆ به‌غدا تا ناكۆكیى نێوانیان نه‌هێڵن، به‌ڵام سه‌ركه‌وتوو نه‌بوون.
"عه‌بدوسه‌لام" عارف كه خۆى قه‌ومى بوو به‌ڵام به‌عسى نه‌بوو، ئه‌م حاڵه‌ته‌ى به هه‌ل زانى و له 18 تشرینى دووه‌م (نۆفه‌مبه‌ر)ى ساڵى 1963ز كۆده‌تایه‌كى به‌سه‌ر به‌عسییه‌كاندا كرد، پیشه‌واكانى سووریا‌ش ده‌ستبه‌سه‌ر كران ته‌وبه و ئیستیغفارێكى باشى به ئه‌حمه‌د حه‌سه‌ن به‌كر كرد، قه‌تڵوعامێكى ناهه‌موارى كردن. پاش ئه‌وه كه وه‌زع هێدى بووه‌وه ئینجا به‌عسییه‌كانى سووریاى به‌رەڵڵا كرد.
شيوعييەكان و فراوانكردنى ناكۆكى:
پاش ئه‌وه‌ى كه عارف له به‌عسییه‌كانى هاوه‌ڵیى دا و شه‌ڕ له كوردستان هه‌ر به‌رده‌وام بوو، وا قاو بڵاو بووبووه‌وه كه ناكۆكییه‌كى كه‌م له‌نێوان به‌رزانى و مه‌كته‌بى سیاسیدا هه‌یه. شیوعییه‌كانى كوردستان ئه‌مه‌یان به هه‌ل زانى و ده‌ورێكى زۆر گه‌وره‌یان له فراوانكردنى ئه‌و ناكۆكییه‌دا بینى. هه‌ر وه‌ك مه‌سئولى لیژنه‌ى ناوچه‌ى پێنجوێن بۆى گێڕامه‌وه، وام پێ باشه وه‌ك وه‌سیقه‌یه‌ك لێره‌دا تۆمارى بكه‌م، چونكه تا ئێستا له هیچ نووسراویكدا له باره‌ى كوردستانه‌وه ئه‌و مه‌سه‌له‌یه‌م نه‌دیوه باس كرابێت.
مه‌سئول ناوچه‌ى پێنجوێنى شیوعییه‌كان پاش ئه‌وه وازى له حیزب هێنا بۆى گێڕامه‌وه و گوتى: "ڕۆژێكیان ده‌عوه‌تنامه‌یه‌كمان له لقى سلێمانیى حیزبه‌وه بۆ هات، كه به زووترین كات و له ڕۆژى دیاریكراودا بگه‌نه باره‌گاى لق. گوتى: ئێمه‌ش ڕۆیشتین، له‌وێ هه‌موو مه‌سئول ناوچه‌كانى پارێزگاى سلێمانى -قه‌ڵادزه، ڕانیه، ماوه‌ت، شارباژێڕ، پێنجوێن، وارماوا، هه‌ڵه‌بجه، شاره‌زوور، ده‌ربه‌ندیخان و قه‌ره‌داغ- ئاماده بووین، له كۆبوونه‌وه‌كه‌دا مه‌سئوولى لق گوتى: هاوڕێیان ئێوه‌مان بانگ كردووه، تا له باره‌ى شتێكى گرنگه‌وه پرس و ڕاتان پێ بكه‌ین، ئایا ڕاتان هه‌یه ئه‌و كاره‌ى ده‌مانه‌وێت ئه‌نجامى بده‌ین یان نا؟
گوتمان: فه‌رموو، گوتى: هه‌واڵمان پێ گه‌یشتووه ساردییه‌ك كه‌وتووەته نێوان مه‌لا مسته‌فا و مه‌كته‌بى سیاسی، و ئه‌م ناكۆكییه‌ى نێوانیان درزێكى بچكۆله‌یه، ئێمه ده‌بێت هه‌وڵ بده‌ین بیكه‌ینه ده‌ربه‌ندێك و هه‌رگیز نه‌توانن یه‌ك بگرنه‌وه. گوتى: ده‌زانن بۆ ئه‌م ئه‌ركه‌ش چیمان ئاماده كردووه؟
گوتمان: نه‌خێر.
گوتى: فڵان هاوڕێ (ده‌ستى كێشا بۆ كوڕێكى بێمووى جوانکیله)، ئه‌م هاوڕێیه ده‌چێته به‌رده‌م مه‌لا مسته‌فا و ده‌ست به گریان ده‌كات و ده‌ڵێت: ئه‌گه‌ر پیاوانى سه‌ركردایه‌تیى حیزبه‌كه‌ى تۆ ته‌عدامان لێ بكه‌ن ئیتر ئه‌بێت دوژمنى ئێمه كێ بێت؟ ئه‌ویش لێى ده‌پرسێت چى بووه و چى ڕووی داوه، پێى ده‌ڵێت: كه مه‌لا ماتۆڕ به‌زۆر سوارى بووه و ته‌عداى لێ كردووه!
و فڵان هاوڕێ (كه ئه‌ویش ئاقره‌تێكى وریا و زیته‌ڵه بوو)، ده‌ڕواته به‌رده‌م بارزانى و ده‌ست به گریان ده‌كات و ده‌رپێیه‌كه‌ى له به‌رده‌مى به‌رزانیدا ده‌كوتێ به زه‌ویدا و ده‌ڵێت: ئه‌مه دین و ویژدانه تۆ ئه‌مانه‌ت به‌ر داوه‌ته گیانى ئێمه، تا ئاوا ئابڕوومان به‌رن؟ پاش ئه‌وه كه لێى پرسى چییه، ئه‌میش بۆى ڕوون ده‌كاته‌وه، كه عومه‌ر ده‌بابه سوارى بووه و شه‌ره‌فى شكاندووه!
گوتى: منیش ده‌ستم هه‌ڵبڕى و گوتم: ئه‌و هاوڕێ كوڕه ئایا مه‌لا ماتۆڕى دیوه و ده‌یناسێت؟ ئایا ئه‌و ئافره‌ته هاوڕێیه عومه‌ر ده‌بابه‌ى دیوه و ده‌یناسێت؟
مه‌سئولى لق گوتى: نه‌خێر هیچیان هیچیان ناناسن.
منیش گوتم: ڕه‌ئى بۆ ئه‌و كاره ناده‌م، چونكه هه‌ر له ئێستاوه فه‌شه‌له.
مه‌سئولى لق گوتى: بۆچ؟
گوتم: وا هات و مه‌لا مسته‌فا كۆمه‌ڵێک پێشمه‌رگه‌ى كۆ كرده‌وه و پێى گوتن: ئه‌گه‌ر عومه‌ر ده‌بابه یان مه‌لا ماتۆڕ وایان لێ كردبن حه‌تمه‌ن ده‌بێ بیانناسن، ئا ده‌ى له‌ناو ئه‌و كۆمه‌ڵه پێشمه‌رگه‌یه‌دا ده‌ریان بهێنن.
ئه‌ویش ماڵى به پشتمدا و گوتى: مه‌لا مسته‌فا له‌به‌ر ئه‌وه‌ى پیاوێكى ئاینییه و سه‌رۆك هۆزه ئه‌م مه‌سه‌لانه‌ى به‌لاوه زۆر سه‌خت و گرانه، هه‌رگیز بیر له‌وه ناكاته‌وه كه تۆ بیرى لێ ده‌كه‌یته‌وه. یه‌كسه‌ر چاوى ده‌په‌ڕێته ته‌وقى سه‌رى و بڕیار ده‌ر ده‌كات.
گوتى: به‌ڵێ، ئه‌و كاره‌مان كرد و سه‌ركه‌وتوویش بووین.
ده‌بێت ئه‌وه بڵێین كه حیزبى شیوعى خودى ناكۆكییه‌كه‌ى دروست نه‌كردووه، ئه‌وه‌ى ئه‌مان ئه‌نجامیان داوه هه‌وڵى فراوانكردنى ناكۆكییه‌كه‌یان داوه، و له ئه‌نجامى ئه‌و كاره‌دا ئه‌و هه‌موو شه‌ڕه خوێناوییانه له‌نێوانیاندا ڕووی دا و تا ئیستاش هه‌ر به‌رده‌وامه.
دانوستانى نوێ:
مه‌كته‌بى سیاسیى ئه‌و سه‌رده‌مه‌ى پارتى دیموكراتى كوردستان، نه‌یده‌ویست له‌گەڵ حكومه‌تى عارفیدا دانو‌ستان بكات، چونكه ده‌یزانى كه عارف نایه‌وێت ئه‌و مافه به كورد بدات كه چاوه‌ڕوانیه‌تى، مه‌لا مسته‌فایش ئه‌وه‌ى ده‌زانى، به‌ڵام ده‌یویست خه‌ڵكه‌كه پشوویه‌ك بده‌ن، چونكه پاڵه‌په‌ستۆى شه‌ڕه‌كه له‌سه‌ر میلله‌ته‌كه زۆر قورس و گران بوو، مه‌كته‌بى سیاسییش زۆر له‌وه ناڕازى بوون، كه: به‌رزانى گوێ به‌وان نه‌دات و ته‌نیا به قسه‌ى خۆى ده‌كات، وا قاو بڵاو بووبووه‌وه، كه مه‌كته‌بى سیاسى ده‌یانه‌وێت به‌ڕه له‌ژێر به‌رزانیدا ده‌ر بهێنن و له سه‌رۆكایه‌تیى حیزب لاى به‌رن، بۆیه به‌رزانى له مه‌كته‌بى سیاسى ناڕازى و نیگه‌ران بوو، به‌ڵام ئه‌و جێى خۆى قایم كردبوو، هه‌موو هێزى پێشمه‌رگه‌ى له‌ژێر ده‌ستدا بوو، له ئه‌نجامدا مه‌كته‌بى سیاسى نه‌یانتوانى ئه‌و كاره بكه‌ن، به‌ڵام ئه‌و توانیی پارتیى ئه‌و سه‌رده‌مه هه‌ر هه‌مووى هه‌ڵبوه‌شێنێته‌وه، مه‌كته‌بى سیاسى ده‌ر بكات، ئه‌و دانو‌ستانه‌شى به هه‌ل زانى بۆ لێدانیان، شه‌ڕێكى گه‌وره له ئاوباریك و ناوچه‌ى ماوه‌ت له‌نێوان هێزى لایه‌نگرى بارزانى و مه‌كته‌بى سیاسیدا ڕووی دا و هێزى به‌رزانى ئه‌وانى شكاند، كردنى به دیوى ئێراندا، ده‌وڵه‌تى ئێرانیش ئه‌وانى به په‌نابه‌ر وه‌ر گرت و له نزیك شارى (هه‌مه‌دان) داینان.
گەڕانەوەمان بۆ پێنجوێن:
پاش ئه‌وه ئێمه‌ش مه‌ریوانمان به‌جێ هێشت و گه‌ڕاینه‌وه بۆ پێنجوێن، ماڵه‌كه‌مان سووتابوو، مامه حاجى ڕه‌سووڵم-خوا عه‌فووی بكات- ژوورێكى له ماڵه‌كه‌ى خۆى پێ داین و له‌وێ دانیشتین و ده‌ستمان به كردنه‌وه‌ى ماڵه‌كه‌ى خۆمان كرده‌وه، ئه‌ڵبه‌ت نه‌ك هه‌مووى بەڵکوو ته‌نیا نیوه‌ى، چونكه ڕێكکه‌وتنه‌كه‌ى به‌رزانى و سه‌لام عارف وا بوو، كه ئه‌و ماڵانه‌ى به هۆى شه‌ڕه‌وه سووتاوه ده‌وڵه‌ت زیانیان بۆ ببژێرێت، له پێنجوێنیشدا هه‌رماڵێك شه‌ش سه‌د دیناریان ده‌دا، هه‌ر ئه‌وه‌نده‌مان بۆ پێ كرایه‌وه.
ژن دياريكردن:
له‌و كاته‌دا ته‌مه‌نم له پانزه ساڵیدا بوو، بربڕه‌ى بلووغیم بوو، دایكم- هه‌زار ڕه‌حمه‌تى لێ بێت- زۆر له‌وه ده‌ترسا تووشى گوناه ببم، هه‌موو جاریكیش ده‌یگێڕایه‌وه كه باوكم به‌ڕە‌حمه‌ت بێت گوتوویه‌تى: ئه‌گه‌ر بمێنم ئه‌م كوڕانه هه‌ر له‌گه‌ڵ بلووغبوون ژنیان بۆ دێنم، ئه‌ویش ناوبه‌ناو داواى ئافره‌تێكى بۆ ده‌كردم، هه‌ندێك له‌به‌ر ئه‌وه‌ى كه هێشتا منداڵم و هه‌ندێك له‌به‌ر ئه‌وه‌ى كه ماڵمان قه‌ره‌باڵغه و كچى خۆى ناخاته ناو ئه‌و هه‌موو عه‌شاماته‌وه نه‌ده‌بوو به نسیب، تا ڕۆژیك دایكم ئه‌م خێزانه‌ى ئێستام له حه‌مامه‌كه‌ى مامه حاجى ڕه‌سووڵدا ده‌بینیت، سه‌یر ده‌كات زۆر لێهاتووه و یه‌ك به یه‌ك خوشك و براكانى ده‌شوات، و پۆشته‌یان ده‌كاته‌وه به‌بێ ئه‌وه‌ى له یه‌كێكیان تووڕه ببێت، ده‌چێت به دڵیا و بێ ئه‌وه‌ى من ئاگام لێ بێت ناردبوویه داواكارى، ئه‌وانیش موافه‌قه‌یان كردبوو.