ئەسحابول ئوخدوود:
پاشان ئەفسەرەکە بە تووڕەیی و ڕقێکەوە گوتی: پەیوەندیی خۆت و "صلاح الدین محمد"م بۆ باس بکە.
گوتم: پەیوەندیی من لەگەڵیا بەو جۆرە بوو کە باسم کرد، ئەوەندە ھەیە ئەو پیاوە نووسەرە و کتێبی ھەیە، کتێبەکانیشی ڕەقابە ڕێی بڵاوبوونەوەیانی داوە، منیش کتێبەکانیم خوێندووەتەوە.
گوتی: کتێبەکانی باسی چی دەکەن؟
گوتم: یەکێکیان باسی ژیانی ئادەم پێغەمبەرە "علیە السلام" و یەکێکی تریشیان باسی ئەسحابول ئوخدوود دەکات.
گوتی: ئوخدوود چییە؟
گوتم: یەعنی چاڵ و خەنەکی گەورە.
گوتی: بەسەرھاتەکەیان چۆن بووە؟
منیش بەدوورودرێژی بۆم باس کرد، پاسەوانەکەیش ھەر بەپێوە وەستاوە و چاوپێچکەکەی بەدەستەوەیە و چاوەڕوانە فەرمانی ئەفسەرەکە بەجێ بێنێ..لەم کاتەدا، کە من باسی (أصحاب الأخدود)م بۆ دەکرد، زارم وشک بووبوو، تەڕایی لە دەمما نەمابوو، زمانم وەر نەدەچەرخا، داوای ئاوم کرد، پەرداخێک ئاویان بۆ ھێنام، لەم ماوەیەدا ئەفسەرەکە دەستی خستبووە ژێر چەناکەیەوە، و زۆر بەباشی گوێی بۆ بەسەرھاتەکە گرتبوو، تا لێ بوومەوە نقەی لێوە نەھات و مات بووبوو! وەک ئەوە لە دڵی خۆیا بڵێ: خۆ بەسەرھاتی ئەو پاشا زاڵمە لە بەسەرھاتی ئێمە دەچێ!
کە بەسەرھاتەکەم تەواوکرد، بەتووڕەییەکەوە گوتی: یەڵڵا بیبەنە دەرەوە، ئیتر پاسەوانەکە پەلی گرتم و ھینامیە دەرەوە.. لەسەر کاشییەکان پەتوویەک ڕاخرابوو، لەسەر پەتووەکە داینام، بە ئەمنەکەم گوت: ئیتر بانگم ناکاتەوە؟
ئەمنەکە وەک ھەندێ بەزەیی تیا دروست بووبێ بەرانبەرم وەھا بوو، گوتی: نە، مەترسە، بۆ خۆت بخەوە!
بەڵام من لە ترسا خەوم لێ نەدەکەوت، بەڕێوەبەری ئەو بەشە (موقەددەمێک) بوو، لەوێوە تێپەڕی و چاوی بە داردەستەکەم کەوت، گوتی: ئەمە چییە؟
گوتیان: ئەوە سەقەتە و لاقی شکاوە.
گوتی: ئەمە سەقەتیشە، وا خوا بە دەستیەوە گیرەۆدەی کردووین؟
زۆر خەمم بوو لاقم بشکێننەوە، پاش ماوەیەک بەڕێوەبەر ڕۆیشتە ژووری لێکۆڵینەوە و لەگەڵ ئەفسەرە لێکۆڵەرەکەدا دانیشت، ئینجا حاجی ڕەشیدیان بانگ کرد و پاش ماوەیەکیش دکتۆر عیسامیان بانگ کرد.
مەسەلەکەی زۆر گران نییە:
گۆێم لێ بوو بەڕێوەبەرەکە لەگەڵ سلێمانیدا بەتەلەفۆن قسەی دەکرد، بەعەرەبی دەیگوت: یەکێکیان ھیچی لەسەر نییە، ئەوی تریشیان مەسەلەکەی زۆر گران نییە!
پاشان بە "حاجی ڕەشید"یان گوت: سبەینێ نووسراوێکت بۆ دەنووسین و لە بازاڕ بەرەڵڵات دەکەین، ئیتر ھێنایانە دەرەوە و لەوبەر منەوە دایاننا، جارێکی تر دەستی بە گریان کردەوە.. بەڵام گریانێکی بەجۆش.
کە ئێمە لەناو ڕاڕەوەکەدا کەوتبووین لە دەوروبەری سەعات یانزەی شەوا دەبوو، بەڕێوەبەرەکە گوتی: ئەمانە بۆچ لێرەن؟ یەڵڵا بیانبەنەوە بۆ زیندانەکەی خۆیان، ئیتر بردینیانەوە بۆ ژوورە تەنیاییەکەی خۆمان.
شەوێ بە "حاجی ڕەشید"م گوت: چییان لێ پرسیت؟
گوتی: کە بردمیانە ژووری لێکۆڵینەوەوە لێیان پرسیم: تۆ مامۆستا "حەمەڕەشیدی ماوەتی"ت؟
منیش پێم گوتن: نەخێر.. دوو سێ تفیان لێ کردم و سێ چوار جنێوی سووکیان پێ دام.
لێیان پرسیم: پەیوەندیت بە دکتۆرەوە چییە؟
گوتم: نایناسم.
بەر بوونە جنێودان پێم، ئینجا ڕۆیشتن دکتۆریان ھێنا و لێیان پرسی: ئەرێ ئەمە "حەمە ڕەشید ماوەتی"یە؟
دکتۆریش ماوەیەک لێم ورد بووەوە و سەرنجی دام، لە ئەنجامدا گوتی: نەوەڵڵا ئەمە ئەو نییە.. ئەو گەنجە و ئەم موویەکی ڕەش لە سەریدا نەماوە، ئەوەند پیرە! کاری ڕاست بێ ئەگەر بیگوتایە ئەوە چیم بکردایە؟
ڕاسپاردە:
حاجی گوتی: مامۆستا گیان! بەیانی نووسراوێکم بۆ دەنووسن و من دەر دەچم، چ ڕاسپێرییەکت ھەیە، تا بە ماڵەوەتانی بگەیەنم.
گوتم: کاک حاجی گیان! دەستم بە دامێنت، ھەر کە گەیشتیتە ماڵەوە، نەوەستیت و لە ھیچ شوێنێک لا نەدەیت، تا دەڕۆیتە ماڵ ئێمە و پێیان دەڵێیت: دەخیل سەد دەخیل! ماڵەکە چۆڵ بکەن و لە ماڵەوە نەمێنن، چونکە ئەفسەرەکە ھەڕەشەی لێ کردووم، نەوەک بڕۆن خێزانەکەم بێنن!
ھەروەھا بە نوورەدین و بەھادینیش بڵێ: باوکتان چاوی ماچ دەکردن و ھەواڵی دەپرسین و دەیگوت: دەستی من و دامێنیان، پشت نەکەنە دینەکەیان، ئاموشۆی مزگەوت بکەن، دڵی دایکیان نەیەشێنن، لەگەڵ یەکترا شەڕ و ھەرا نەکەن، بەھادین وەک لێپرسراوێکی ماڵە، دەبێ لە تەکیانا بەڕەحم بێت و ئامۆژگارییان بکات، بەناھەق قسەیان پێ نەڵێت و لێیان نەدات، دەبێ ئەوانیش ڕێزی لێ بگرن و قسەی نەشکێنن، بە قوربانیان بم خوێندنەکەیان پشتگوێ نەخەن، چونکە دوژمن ئاواتەخوازە: ئەوان نەخوێندەوار بن!
حاجی ڕەشید گوتی: بەسەرچاو، ھەر کە ڕۆیشتمەوە پێش ھەموو شتێ دەچمە ماڵ ئێوە و پێیان ڕادەگەیەنم. ([1]).
ئیتر ئەو شەوە خەوتین، بەڵام چ خەوتنێک! ھەریەکەمان بەتانییەکی شڕی ڕزیومان لەسەر چیمەنتۆ ساردەکە ڕاخست، پەتوویەکی ڕەشی شڕمان بە خۆمانا دا، بەڵام پێڵاوەکانمان دانەکەند، شەش حەوت سەموونی کۆنی تیا بوو، ئەوانەمان خستە ژێر سەرمان و خەوتین.. ئا لێرەدا ئەو قسەی پێشینانەمان لە واقیعدا بینی کە دەڵێت: سەرما بە پێی حاڵە! باوەڕتان ھەبێ ئارەق کەوتبووە ناوچاوانمەوە!
فریشتەی ڕەحمەت:
ڕۆژی دوو شەممە ٢٣/٢ /٨٧ لە خەو ھەستاین، نوێژی بەیانیمان بەجەماعەت کرد، ھەندێ ویرد و ئەورادمان خوێند، بەگەردنکەچییەکی زۆرەوە لە خوا پاڕاینەوە. حاجی ڕەشید سەری خستە سەر ھەردوو ئەژنۆی و ھەردوو دەستی خستە بەر ھەردوو ئەژنۆیەوە، پاش ماوەیەک ھەستا و دەستی بە سینەیەوە گرت و سەری لار کردەوە، دەم بە بزە و ڕووخۆشییەوە ڕێزێکی زۆری نواند، لەبەر خۆیەوە ھەندێ قسەی کرد و پاشان دانیشتەوە.. منیش پێکەنیم و گوتم: ئەوە چی بوو حاجی بۆ وات کرد؟
گوتی: ئەوە شاھی سیراجوددین تەشریفی ھێنابوو، پاشان بەپێکەنینەوە گوتی: ئێستا تۆ پێم دەڵێیت: شێتیەتی جۆری زۆرە! بەڵام ناھەقت نییە چونکە تۆ لە دنیایەکی ترا دەژیت! پاش ئەوە کە ڕۆژ بووەوە دەرچەی دەرگاکە کرایەوە، پیاوێکی گەنجی ڕەشتاڵە، سەری خستە ئەم دیوەوە و گوتی: ئەوە ھەر ئەو پەتوانەتان پێیە؟
ئێمەش لە ترسی سەرما باش خۆمان داپۆشیبوو، بە ھۆی گڤەگڤی با و وڕەوڕی ھەواکێشەکەوە باش لە قسەکانی حاڵی نەدەبووین، گوتمان: ھا، دەڵێی چی؟ ئیتر ھەڵنەساین و نەڕۆیشتین بە دەمیەوە!
کابراش تووڕە بوو، گوتی: بابە! ئەگەر یەکێک ھات بۆ لاتان و قسەی لە تەکتانا کرد ھەستن و بێن بە دەمیەوە، چۆن دەبێ دابنیشن؟
ئێمەش ھەستاین و چووین بە دەمیەوە و گوتمان: ئەڵێی چی؟
گوتی: تەنیا ئەو بەتانییانەتان ھەیە؟
گوتمان: بەڵێ.
ئیتر ڕۆیشت شەش پەتووی تری بۆ ھێناین، زۆر دڵخۆشی کردین، وەک فریشتەیەکی ڕەحمەت دەھاتە پێش چاومان! بۆیە زۆر سوپاسمان کرد و مەمنوونی بووین، پاشان ڕۆیشت قەمسەڵەکەیشی بۆ من ھێنا.. ئیتر شەوقمان تێ ھاتەوە.
[1] - بەڵام بەداخەوە حاجی کە گەیشتبووە سلێمانی، کەسانێکی نائینسان، نەیانهێشتبوو بڕوات بۆ ماڵ ئێمە و ئەویش ڕاسپاردەکەی پێ نەگەیاندبوون، خوا لێی خۆش بێت..