مەرگەساتەکەی هەڵەبجە
سێ ڕۆژى مابوو بۆ نه‌ورۆز، كه‌ریم هه‌ستى ده‌كرد به‌هارى ئه‌مساڵ وه‌ك ساڵانى پێشین نییه، شاره‌كه‌ى به‌رگى خه‌م و ماته‌مینى داكه‌ندووه، پۆشاكى نوێى پۆشیوه، بۆ شایى و زه‌ماوه‌ندى گه‌یشتن به دڵخواز.
ئه‌و ڕۆژه جه‌ژن و شادى بوو، چونكه خه‌ڵكى به جگه‌رگۆشه و خۆشه‌ویستانیان شاد بووبوونه‌وه، برا به برا و باوك به كوڕ و منداڵ به باوكى و ژن به مێردى، ئه‌وانه‌ى زۆر له‌مێژ بوو چاوه‌ڕوانى دیتنیان بوون، زۆر به ئاوات بوون ڕۆژێكى وا بێته پێش وا هاتووه.
كابووسى شووم و مێرده‌زمه‌ى ئێسكقورسیان لێ دوور كه‌وتووەته‌وه، ئیتر دێهاته كاولــكراوه‌كان ئــاوه‌دان ده‌كه‌نه‌وه، كانیاوه به‌چیمه‌نتۆ پڕكراوه‌كان پاك ده‌كه‌نه‌وه.
جارێكى تر هاژه‌ى شه‌تاوه‌كان ده‌بیستن، جارێكى دى باخ و بێستانه وشككراوه‌كان زیندوو ده‌كرێنه‌وه، كاڵاى سه‌وز ده‌پۆشن به‌رهه‌مى پڕ پیت و به‌ره‌كه‌تیان ده‌ده‌نه‌وه. به‌ڵێ، هه‌موو له‌م خۆشى و شادییه‌دا بوون، خه‌یاڵ و ئاواته‌كان ئاوێته بووبوون و خه‌ونیان پێوه ده‌بینین، وایان ده‌زانى ئاسۆ زۆر ڕوونه و ئاوسه به كامه‌رانى و به‌خته‌وه‌رى، ئه‌وه‌ته زاڵم گۆڕی گوم بووه، بارگه و بنه‌ى پێچاوه‌ته‌وه، ڕسوا و زه‌لیل بووه، ئه‌وه‌ى تیاچوو چووه، ئه‌وه‌ى هه‌ڵهات ده‌ر چووه و ئه‌وه‌ى جێما به دیل گیراوه!
با گوێ بۆ كه‌ریم بگرین، گۆشه‌یه‌ك له‌و مه‌رگه‌ساته‌ى هه‌ڵه‌بجه‌مان بۆ بگێڕێته‌وه، كه به چاوى خۆى بینیویه‌تى، و له‌گه‌ڵیا ژیاوه.
به‌هاریان كردینه پایز:
به‌ڵێ برایان ئه‌و ڕۆژه خۆشى و شادى بوو، نه‌مانزانى به‌هارى ڕاسته‌قینه‌مان ئه‌و به‌هاره‌ى بیست و پێنچ ساڵ بوو خۆى لێ شاردبووینه‌وه ته‌مه‌نى ته‌نیا ڕۆژێك ده‌بێ. ئه‌ڵبه‌ت ئه‌وانه‌ى دنیادیده بوون ئه‌وانەى ئه‌زموونیان هه‌بوو و دوژمنیان باش ده‌ناسى كه چه‌ند دڵڕه‌ق و دڕنده‌یه، هاواریان ده‌كرد: كوڕه خه‌ڵكینه! برایان! با قایمه‌یه‌ك بكه‌ین، ماوه‌یه‌ك خۆمان حه‌شار ده‌ین، بۆ چه‌ند ڕۆژێكیش بووه با شار چۆڵ بكه‌ین.
ته‌نیا دوو ڕۆژى مابوو بۆ نه‌ورۆز، داره‌كان چرۆیان ده‌ر كردبوو، دەشتوده‌ر تارایه‌كى سه‌وزى ناسكى به‌سه‌ر خۆیا دابوو، ئا له‌م ڕۆژه‌دا بوو، ده‌وڵه‌تى به‌عس شه‌یتان سیفه‌تانه، به فڕۆكه ڕووسى و فه‌ڕه‌نسییه‌كان و گازه كوشنده ئه‌ڵمانى و ئینگلیزییه‌كانى و به كۆمه‌كى و پشتیوانیی ئه‌مریكا ئاواتیان سووتاندین و شایى و شادییان كردینه شیوه‌ن و پێكه‌نینه‌كانیان سه‌ربڕین و به‌رگى بووكێنییان دزین، و به‌هاریان كردینه پایز.
به‌ڵێ، ئه‌و ڕۆژه ناوشاریان به ناپاڵم و بۆمبا هێشووییه‌كان بۆمباران كردین، ناڵه‌ى سیخۆ و گرمه‌ى میك و زرمه‌ى سارووخ و ورمه‌ى بۆمباكان دنیایان ده‌له‌رانده‌وه، چه‌ندان ڕیزه ماڵ ساراكڵ بوون، هه‌زاران ژن و منداڵ و خه‌ڵكى بێچه‌ك كوژران و شه‌هید بوون.. تــه‌نیا ماڵى "ڕه‌شه‌ى سه‌مه‌ن" چل كه‌سى تیا شه‌هید بوو.
بۆمباى كیمیاوى:
پێش نیوه‌ڕۆ فڕۆكه‌كان ئاوا به ناپاڵم بۆمبارانیان كردین، وا دیار بوو، دوژمن به‌م كه‌تنه‌ى دڵى دانه‌مركا بوو، بۆیه له ده‌ماوده‌مى نیوه‌ڕۆ و لە كاتى نانخواردنا، كه سفره و خوان ڕاخرا بوو دیسان فڕۆكه‌كانى نارده‌وه سه‌رمان، وامان زانى دیسان به ناپاڵم و سارووخه‌كانى تــر لێمان ده‌دات، بۆیه هه‌موو به‌ره‌و ژێرزه‌مین و په‌ناگاكان ڕامـان كرد، وا دیار بوو فێڵى لێ كردین، بۆ ئه‌وه‌ى باش خۆمان قایم بكه‌ین، تا به‌ته‌واوى گازه‌كه هه‌ڵمژین، و قڕمان تێ بكه‌وێت!
هه‌ر وا بوو فڕۆكه‌كان هاتن و چوون، دڵمان خۆش بوو كه ئه‌م جاره قه‌سفیان نه‌كردین! كه‌چى نه‌مانزانى بۆمبایه‌كیان پیا داوین زۆر له ناپاڵم كوشنده‌تر، بۆمباى كیمیاوى. به‌ڵێ پێمان نه‌زانى -چونكه ده‌نگى نه‌هات- تا چاومان سووتایه‌وه و بۆگه‌نێكى وه‌ك بۆى سیرمان بۆن كرد.. ئه‌وانه‌ى شاره‌زاییان هه‌بوو هاواریان كرد گازى كیمیاوییه فریاى خۆتان بكه‌ون! ده‌موچاوتان ته‌ڕ بكه‌ن و بێنه دره‌وه و به‌ره‌و به‌رزاییه‌كان بڕۆن، كه هاتینه ده‌ره‌وه ناوشار به ته‌م و دووكه‌ڵى كیمیاوى شارابووه‌وه.
دووكه‌ڵه‌كه به‌زۆرى گەڕه‌كى كانیقوڵكه و به‌ره‌و عه‌نه‌بى گرتبووه‌وه، ئه‌م ناوه له هه‌موو شوێنێك زیاتر گازى پیا ڕێژرابوو، ئێمـه‌ش كه هاتینـه ده‌ره‌وه وه‌ك شێتمان لێ هاتبوو، نه‌مانده‌زانى چى بكه‌ین و به‌ره‌و كوێ بچین؟
ڕۆژى قیامه‌ت:
له ئه‌نجامدا به‌ره‌و عـه‌نه‌ب ڕامانكرد، له قورئان و حه‌دیسدا باسى ڕۆژى قیامه‌تمان بۆ كراوه " يَقُولُ الإِنسَانُ يَوْمَئِذٍ: أَيْنَ الْمَفَرُّ؟" ([1])،ئه‌و ڕۆژه به‌ته‌واوى نموونه‌یه‌كى بچووكى ڕۆژى قیـامه‌ت بوو، په‌نجا شه‌ست هـه‌زار كــه‌س كه‌وتبووه ئه‌و ڕێگه‌یه، هه‌رمنداڵێك ده‌ستى له ده‌ستى دایك و باوكى به‌ر ببووایه دۆزینه‌وه‌ى مه‌حاڵ بوو.
خه‌ڵكێكى زۆر له‌و ڕێیه‌دا كه‌وتن و تواناى ڕۆیشتنیان نه‌ما، دوژمنى دڵبه‌رد جارێكى تر فڕۆكه‌كانى نارده‌وه بۆ سه‌رمان و ده‌ورى عه‌نه‌بى گازپژێن كرده‌وه، شه‌پۆلى خه‌ڵكه‌كه به‌ره‌و دوا هــاته‌وه، له‌و گه‌ڕانه‌وه‌یه‌دا ئێمه له یه‌ك دابڕاین، هه‌رچه‌ند بۆ دایكم و باوكم گه‌ڕام نه‌مدۆزینه‌وه، خـــوشك و برا بچكۆله‌كانیشم لێ ون بوون، من گه‌ڕامه‌وه بۆ ڕێى عه‌بـــابه‌یلێ، منیش كه‌وتم و ئاگام له خۆم نه‌ما و نه‌مزانى دواى ئه‌وه چى ڕووى دا؟
تومه‌ز پاش ئه‌وه‌ى كه من ده‌كه‌وم و بێهۆش ده‌بـم ترۆمبێلێك دێت و به‌زه‌ییان پیاما دێته‌وه و هه‌ڵمده‌گرن و ده‌مـگه‌یـه‌ننه یه‌كێ له نه‌خۆشخــانه ســه‌رپێیه‌كانى سه‌ر سنوور، كــه چاوم كرده‌وه له‌ناو چادرێكا بووم.. خوا پاداشتی خێریان بداته‌وه تیمـاریان كردم، وا دیار بوو تووشبــوونه‌كه‌م زۆر كه‌سكون نه‌بوو، بۆ سبه‌ینێ له نه‌خۆشخانه ده‌ر چووم.
ئینجا خه‌مى برا و خوشـكه بچكۆله‌كه‌م و دایك و باوكـم بوو، داخۆ چییان به‌ســـه‌ر هاتبێ؟ زۆر خه‌مى دایك و باوكـم بوو، زۆر به‌زه‌ییم پیایاندا ده‌هاته‌وه، چونكه زۆر له‌مێژ نه‌بوو له لایه‌ن به‌عسییه‌كانه‌وه جه‌رگیان هــه‌ڵقرچێنرابوو، كاكمیان گولـله‌باران كردبوو، هاتن پاره‌ى ئـه‌و فیشه‌كانه‌شیان لێ سه‌ندین، كه پێوه‌یان نابوو، نه‌شیانهێشت پرسه‌ى بۆ دابنێن و بـــه‌دزییـه‌وه ته‌رمه‌كه‌یمان ناشت! كاتێ ڕامانكرد زامى جــه‌رگیان هێشتا نوێ بـوو و خوێنى لێ ده‌تكا.
له هه‌موو ڕێگاكانه‌وه خه‌ڵكى به‌ره‌و هه‌ڵه‌بجه كه‌وتبوونه ڕێ، تا هه‌واڵى كه‌سوكاریان بزانن، ئایا مردوون یا ماون؟ منیش وه‌ك ئه‌و خه‌ڵكه ڕۆیشتمه‌وه.
گه‌ڵاڕێزانى به‌هار:
برایان یا خوا ئه‌وه‌ى من دیم دوژمنیشتان نه‌یبینێ! به سوارى گه‌ڵابه‌یه‌كه‌وه بووم قه‌سه‌م به خوا خه‌ڵكى كۆمه‌ڵ كۆمه‌ڵ له سه‌ر ئه‌مبه‌ر و ئه‌وبه‌رى جاده‌كه‌وه جوان و پیر و منداڵ وه‌ك گه‌ڵاڕێزانى پایز كه‌وتبوون، گه‌ڵابه‌كه نه‌یتوانى بڕوات، ناچار دابه‌زین لاشه‌ى مردووه‌كانمان لا دا، ئه‌ڵبه‌ت له‌پێش ئێمه‌شه‌وه زۆرىتر لا درابوون.
به‌ناو لاشه‌كاندا هاتین دیتم كۆمه‌ڵێک منداڵ كه‌وتوون، برا و خوشكه‌كه‌م له‌گه‌ڵ ئه‌واندا مردبوون، چاویان بۆ عاسمان به‌رز كردبووه‌وه وه‌ك ئه‌وه له خوا پاڕابووبنه‌وه و گوتبێتیان: خوایه! تۆڵه‌مان له‌وانه بۆ بسێنه كه به ئاگرى داخ له دڵی خۆیان تا ئێستاش ئێمه ده‌سووتێنن، له‌به‌ر ئه‌وه‌ى نه‌وه‌ى سه‌لاحه‌دینین، خوایه سه‌به‌بكارمان زه‌لیل و ڕیسوا بكه!
كۆمه‌ڵێک مناڵى بچووكیش له نزیــك ئه‌وانه‌وه لاڵ و پاڵ كه‌وتبوون، زۆریان كچ بوون، ئه‌و براده‌ره‌ى له‌گه‌ڵما بوو ده‌ستى كرده گریان و گوتى: خوا مه‌حكه‌مه‌ى زاڵمان ده‌كات و له زینده‌به‌چاڵكراو و ئه‌م بێتاوانانه ده‌پرسێ: به چ تاوانێك كوژران؟ " وَإِذَا الْمَوْءُودَةُ سُئِلَتْ: بِأَيِّ ذَنْبٍ قُتِلَتْ"([2]) چاڵمان بۆ هه‌ڵكه‌ندن و به خاكمان سپاردن، ئینجا به شوێن دایك و باوكمدا ده‌ستم به گه‌ڕان كرد، زۆر گەڕام نه‌مدۆزینه‌وه.
عومه‌رى خاوه‌ر:
له‌و كاتى گەڕانه‌دا شتى زۆر دڵته‌زێنم دى، ئافره‌تێكم دى خۆى مردبوو، منـــــداڵكانیشى به ده‌وریا گیانیان ده‌ر چووبوو، یه‌كێكیان به‌رمه‌مـــــكان بوو، به‌ســــه‌ر سنگى دایكییه‌وه گیـــانى ده‌ر چووبوو، ئه‌وانى تریش وه‌ك خونچه‌گوڵى هه‌ڵپڕووكێنراو به ده‌ورى دایكیانا كه‌وتبوون. ئه‌وه‌ى زۆر ئێشه‌كه‌ى كاریگـــه‌ر بوو ئازارى به‌ته‌واوى دام، دیمه‌نى "عومه‌رى حه‌مه‌ساڵح" بوو، كه به "عــــومه‌رى خاوه‌ر" به‌ناوبانگ بوو.
ئه‌م پیاوه نۆ كچى هه‌بوو، زۆر به ئاوات بوو خوا كوڕێكى پێ ببه‌خشێت، هه‌زار شێخ و مه‌شایه‌خ و شاره و شارى كرد، سه‌رى له چه‌ندین دكتۆر و حه‌كیم دا به‌ڵكوو كوڕێكى ببێ، قه‌ده‌ر وا بوو خێزانه‌كه‌ى به سكێ دوو كوڕى بوو، ئه‌مانه به دواى نۆ كچا هاتبوون زۆر خۆشه‌ویست بوون، ئه‌گه‌ر ده‌ستێكیان گه‌رم ببووایه، باوك و دایك و هه‌ر نۆ خوشكه‌كه خۆیان به ده‌ورا ده‌گێڕان، له كاتى كیمیابارانه‌كه‌دا كاك عومه‌ر یه‌كێكیان ده‌گرێته باوه‌ش، خێزانیشى ئه‌وى تریان، به‌و هیوایه‌ى خۆیان بگه‌یه‌ننه په‌نایه‌ك و ڕزگار ببن و له ماڵ ده‌ر ده‌چن، بەڵام له‌سه‌ر كۆڵانه‌كه‌دا كاك عومه‌ر كه‌وتبوو، منداڵه‌كه‌ى توند له باوه‌ش گرتبوو، به لفكه‌ى جامانه‌كه‌ى سه‌ر و لووتى داپێچابوو، منداڵه‌كه‌ى وا له ئامێز گرتبوو، به مردووییش لێى نه‌ده‌كرایه‌وه.
وه‌ك ئه‌وه ویستبێتى خۆى بكاته قوربانى كوڕه‌كه‌ى و پشتیوانى نۆ كچه‌كه‌ى، به‌ڵام هه‌ردووکیان بوونه نه‌فرینى هه‌میشه‌یى بۆ ناوچاوى به‌عس و حكومه‌ته‌كه‌ى، وێنه‌كه‌ى كرایه هێماى قه‌تڵوعامى هه‌ڵه‌بجه، ئیتر نازانم كچه‌كانى چییان به‌سه‌ر هاتبوو.
ئافره‌تێكى تریش به كۆرپه‌كه‌یه‌وه له‌ولاوه كه‌وتبوو، پێم وا بێ خێزانه‌كه‌ى كاك عومه‌ر بوو، به‌ڵام دڵنیا نه‌بووم، چاوى نابوو به یه‌كدا و تا ده‌ستى شل بووبوو كۆرپه‌كه‌ى له ئامێز گرتبوو، ئه‌ویش پاش دایكى گیانى ده‌ر چووبوو، سه‌رى له‌سه‌ر باسكى دایكیدا بوو، چاوى بڕیبووه ئاسمان وه‌ك ئه‌وه هاوار بكاته خواو بڵێ: خوایه! تۆڵه‌ى ئه‌م هه‌موو بێتاوانانه، تۆڵه‌ى ئه‌و هه‌موو دایكه جگه‌رسووتاو و باوكه پشتشكاو و خوشكه كۆسكه‌وتووانه له سته‌مكارانى سه‌ده‌ى بیسته‌م بسێنه.
وه‌سێتنامه:
به‌ڵێ، زۆر به شوێن دایك و باوكمدا گه‌ڕام، دایكم ئێوه خۆش، له ئه‌نجاما باوكیشم له خه‌سته‌خانه‌یه‌كى تاراندا دۆزییه‌وه، ناو گه‌رووى گیرابوو، ده‌نگى ده‌ر نه‌ده‌هات، به‌هه‌زار حاڵ تا ده‌نگى ده‌بیسترا، هه‌ردوو چاویشى كوێر بووبوو، بەڵام پێش ئه‌وه‌ى گیانى پاكى ده‌ر بچێت بو به‌سه‌ر ماددیاتدا به‌ره‌و مه‌له‌كووتى پیرۆزى په‌روه‌ردگار په‌رواز بكات و بفڕێ ئه‌م وه‌سێته‌ى بۆ كردم:
كوڕم! ده‌ستى من و دامێنت ئه‌م سكاڵایه‌م بده به گوێى خه‌ڵكى جیهاندا، هه‌ر وه‌ك ده‌زانى من ده‌مه‌وێ هاوار بكه‌م به‌ڵام گه‌رووم گیراوه و ده‌نگم ده‌رنایه، ده‌مه‌وێ چاو بكه‌مه‌وه، به‌ڵام چاوم سووتاوه و له ڕه‌شى موتڵه‌ق به‌ولاوه شتێكى دى نابینم، لاق و باڵم تواناى خۆگرتنیان نه‌ماوه، پێ و پلم تواناى ڕۆیشتنیان لێ بڕاوه، تا بڕۆیشتمایه و مه‌زڵوومبوونى خۆمانم بۆ خه‌ڵكى دنیا باس بكردایه.
كوڕه خۆشه‌ویسته‌كه‌م ! كوڕه بێ باوك و دایك و خوشك و برا كه‌وتووه‌كه‌م! تكا له تۆ و هه‌موو موسڵمانێك ده‌كه‌م له باتیى من به كۆمه‌ڵه‌ى مافى مرۆڤـ بڵێن: ئه‌وه بۆچی وا خۆیان حه‌شار داوه؟ بۆ فززه‌یان له خۆیان بڕیوه؟ ئایا ئێمه‌ى كورد له ڕوانگه‌ى ئه‌وان و ئاغاكانیانه‌وه به مرۆڤ دانانرێین؟ تو خوا ئه‌گه‌ر له جیاتیى ئێمه پێنچ هه‌زار ئاسكه‌كێوى ئاوه‌ها به گازى خه‌رده‌ل و سیانۆر بكوژرایه كۆمه‌ڵه‌ى مافى ئاژه‌ڵ دنیاى نه‌ده‌شڵه‌ژاند و گوێى دنیاى كه‌ڕ نه‌ده‌كرد؟ به‌ڵام وا دیاره كوفرى جیهانى و زلهێزه‌كانى دنیا ئاژه‌ڵیـان به‌لاوه به‌ڕێزتر بێت تا خه‌ڵكى جیهانى سێیه‌م!!
بڕۆنه فاتیكان و به پاپا پۆڵسى شه‌شه‌م بڵێن: بۆ له حه‌ناى قه‌تڵوعامى خه‌ڵكى بێتاوانى هه‌ڵه‌بجه‌دا خۆیـان كه‌ڕ و لاڵ كردووه؟ مرۆڤدۆستى و ئاشتیویستى وا ده‌بێت؟ كاتى خۆى ده‌مانبیست كلیلى قوفڵى قسه‌یان له گیرفانى سه‌رانى كۆشكى ڕه‌شدایه، نه‌مانده‌توانى بیسه‌لمێنین وا واقیع پێى سه‌لماندین!
دۆستان! له ده‌م پیره‌پیاوێكى هه‌ڵه‌بجه‌ییه‌وه، كه له دواهه‌ناسه‌ى ژیانیایه‌تى و له نه‌خۆشخانه‌ى خه‌م و غه‌ریبیی تاراندا، كه‌وتووه به پشتیوانه درۆزنه‌كانى چینى چه‌وساوه بڵێن:
ئه‌گه‌ر خوێنمژ و داخ له‌دڵه سه‌رمایه‌داره‌كانى ڕۆژاوا هیچ نه‌ڵێن جێى سه‌رسامیمان نییه، چونكه دین و ژیان و خواى ئه‌وان به‌رژه‌وه‌ندیى ئابوورییه.. به‌ڵام ئێوه بۆ وا بێهه‌ڵوێست بوون؟ ناوه‌ڕۆكى ڕاسته‌قینه‌ى ئێوه‌شمان بۆ ده‌ر كه‌وت و ئاشكرا بوو!
ئه‌و هه‌ژارانه‌ى جڵه‌ویان له ده‌ست خۆیاندا نییه و به‌ناو پاشا و ماشاكانى جیهانى ئیسلامین و میلله‌تانى خـــۆیان بۆ ڕازیبوونى ئاغاكانیان قه‌لاچۆ ده‌كه‌ن ئا له‌م كاته‌دا به نـاوى كۆنگره‌ى وڵاتانى ئیسلامییه‌وه كۆ ده‌بنه‌وه و كۆنگره ده‌به‌ستن، ده‌یــكه‌نه سه‌رپۆشێك بۆ تاوانه گه‌وره‌كه‌ى به‌عس و نه‌ك هه‌ر بوونــه شه‌یتانى لاڵ، به‌ڵكوو خۆیشیان كرده شه‌ریك و هاوبه‌ش له‌و تاوانه‌یدا([3]) .
كوڕه ته‌نیاكه‌وتووه‌كه‌م! له ده‌م باوكى به‌ساڵاچووى جه‌رگهه‌ڵقرچاوى دڵسووتاوى كه‌س بۆنه‌ماوى خۆته‌وه - كه به‌ته‌ماى ئه‌وه نه‌ماوه فڕۆكه‌یه‌ك بێت بیبات بۆ ئه‌وپه‌ڕى دنیا و بیگه‌یــه‌نێته نـه‌خۆشخانه‌یه‌كى كه‌مپیوته‌رى، تا بینایى له‌ده‌ستچـووى و گه‌رووى تیاچووى به ده‌ست بێنێته‌وه، تـا بۆ خـۆى بگرى و بۆ مــاڵ و منـداڵى قڕتێكه‌وتووى هاوار بكات و سكاڵاى حاڵى خۆى و میلله‌ته‌كه‌ى بۆ خه‌ڵكى دنیا باس بكات- ببیسته: باش حاڵى بووم و چاك تێگه‌یشتم كه لـه‌م جیهانه‌دا عه‌داله‌ت و دادگه‌رى له‌ژێر ئاڵاى ئیسلامى ڕاستــه‌قینه‌دا نه‌بێ، له هیچ شوێنێكى دنیادا ده‌ست ناكه‌وێت.
به‌ڵێ، كوڕى خۆم! ڕووسێك كه فڕۆكه‌ى سۆخۆ و مێكى پێشكه‌وتوو به به‌عس بدات، فه‌ڕه‌نسه‌یه‌ك میراج و ڕاجیمه‌ى چلچلى بداتێ، ئینگلیزێک گازى خه‌رده‌لى پێ ببه‌خشێت، ئه‌ڵمانێك سیانۆرى بۆ بنێرێت، ئه‌مه‌ریكایه‌ك ملیاره‌ها دۆلار و مانگه ده‌ستكرده‌كانى بخاته ژێر ده‌ستى، چۆن به‌ته‌ما بم ئه‌وانه پاسه‌وانى به‌رژه‌وه‌ندییه‌كانى خۆیان تاوانبار بكه‌ن؟
هه‌رگیز له بیرتان نه‌چێت دوژمنى ئێمه ته‌نیا به‌عس نییه، به‌ڵكوو ئه‌و ته‌نیا ئامێرێكه بۆ ئه‌نجامدانى ئه‌و تاوانه، ده‌نا هه‌ر ئه‌و ده‌سته‌ى نا‌کازاكى و هێرۆشیماى وێران كرد هه‌مان ده‌ستیش بوو هه‌ڵه‌بجه‌ى وێران كرد.
كاتێ باوكم له وه‌سێته‌كه‌ى بووه‌وه جارێكى تریش گوتى: كوڕم دوژمنى خۆتان باش بناسن.
پێش ئه‌وه‌ى گیانى ده‌ر بچێ په‌نــجه‌ى شایه‌تمانى به‌رز كرده‌وه و گوتى: لاإله إلا الله، ده‌ستى هێنا بـه‌سه‌ر دڵیا و گیانى پاكى به‌ره‌و به‌هه‌شتى به‌رین په‌روازى كرد.
ئه‌وه‌ى له ته‌نیشت كه‌ریمه‌وه دانیشتبوو گــوتى: هه‌زار ڕه‌حمه‌ت له گیانى پاكت مام عه‌لى، به‌ڕاستى دوژمنانى خۆت و میلله‌ته‌كه‌ت باش ناسیوه.
ئه‌وه‌ته بۆ ته‌نیا كه‌سێكى وه‌ك سه‌لمان ڕوشدى كه هێشتا نه‌كوژراوه، هه‌موو ده‌وڵه‌تانى ڕۆژئاوا باڵوێزه‌كانی خۆیان بانگ كرده‌وه بۆ ناڕه‌زاییده‌ربڕینى خۆیان له‌سه‌ر نیازى كوشتنى!! بـەڵام بۆ كوشتنى پێنج هـه‌زار موسڵمانى كورد و برینداربوونى ده هـه‌زار و ئاواره‌بوونى شه‌ست هه‌زار كه‌س، سه‌د یه‌كێكى ئه‌وه‌یان بۆ نه‌كرد؟
ڕه‌حمه‌ت له گۆڕت مام عه‌لى، به‌ڕاستى دوژمنى خۆت و میلله‌تت باش ناسیوه!...([4])
[1] - سورة القيامة/10.
[2] - سورة التكوير/8،9 .
[3] - "الساكت عن الحق شيطان أخرس" .
- - ئه‌م چیرۆكه له ڕۆژى شـه‌ممه 18 - 3 - 1989 له هۆڵى گه‌وره‌ى سنه‌دا، به بۆنه‌ى یه‌كه‌م ساڵیادى كیمیابـارانه‌كه‌ى هه‌ڵه‌بجه‌وه له لایه‌ن نووسه‌ره‌وه خوێنرایه‌وه، دوایش پاشــكۆى گۆڤارى نه‌فیر بڵاوى كرده‌وە.